Ыбырай Алтынсариннің туғанына 180 жыл

Ыбырай Алтынсарин – қазақтың аса көрнекті ағартушы-педагогі, ақын, жазушы, фольклоршы, этнограф, қоғам қайраткері. Шын аты – Ибраһим. Ол 1841 жылы 20 қазанда Қостанай облысы Затобол ауданында дүниеге келген. Орта жүздің Қыпшақ руынан шыққан.

Ы.Алтынсарин бар өмірін жастарға білім беруге арнаған. Ыбырай қазақ даласында бірінші болып қыздарды білімге тартты. 1887 жылы Ырғызда қыздарға арналған мектеп-интернат ашты. Қыздар мектебін ұйымдастыруы — ұлы ағартушының бұл тұрғыда жасаған үлкен еңбегі. Ы.Алтынсарин оқу-ағарту жұмыстарына өз заманының ең озық əдістемелерін қолдана отырып, білімнің балаларға ана тілінде берілуіне айрықша мəн берген. Сондықтан да «Қазақ хрестоматиясы» атты оқулық жəне «Қазақтарға орыс тілін үйретудің бастауыш құралы» атты дидактикалық оқу құралын жазған. 1879 жылы жарық көрген «Қазақ хрестоматиясы»: бірінші — балалар өмірі туралы орыс тіліндегі əр түрлі хрестоматиядан, көбіне Паульсонның хрестоматиясынан алынған əңгімелер; екінші əр түрлі жастағы адамдардың өмірін суреттейтін əңгімелер; үшінші — қазақ жыршыларының өлең жырларынан үзінді; төртінші — қазақтың мақал-мəтелдері тəрізді төрт бөлімнен құралған.